مەحمود عەباس سەرۆکی فەلەستین رایگەیاند، ئیسرائیل پابەندنەبووە بەو رێکەوتنانەی واژووی کردووە و بە مافی خۆیان دەزانن بەرگری لە خاکەکەیان بکەن.
مەحمود عەباس ئەمڕۆ سەرۆکایەتی کۆبوونەوەیەکی بەرپرسە سەربازییە باڵاکانی وڵاتەکەی کرد و جەختیلەوەکردەوە، ئەوەی روودەدات تیرۆرە و مافی گەلی فەلەستینییە بەرگری لە خۆیان بکەن”.
ئاماژەی بەوەشکرد، “پێشتر هۆشداریمان لەو چەقبەستووییە سیاسییە و لەو دۆخە داوە کە گەلی فەلەستینی ناتوانێت مافی چارەی خۆنووسی خۆی دیاریبکات، ئەمەی ئەمڕۆش روودەدات دەرئەنجامی ئەو هێرشانەیە کە رۆژانە ئیسرائیل دەیکاتە سەر مزگەوتی ئەقسا و شوێنە پیرۆزەکانی مەسیحی و موسڵمانان”.
مەحمود عەباس وتیشی، “هەڵوەشاندنەوەی رێکەوتنە واژووکراوەکان لەلایەن ئیسرائیلەوە و پابەندنەبوون بە بڕیارە نێودەوڵەتییەکانەوە پرۆسەی ئاشتی لەناوبردووە”.
لە ئێستادا لە فەلەستین دۆخی نائاسایی راگەیەندراوە، سەرجەم پزیشکان و تیمە تەندروستییەکان گەڕاونەتەوە سەر کارەکانیان و ئامادەیی خۆیان بۆ پێشوازی لە قوربانیانی هێرشەکەی ئیسرائیل دەربڕیوە.
