سەرۆكی ئەنجومەنی هەرێمایەتیی ناوچە سنوورییەكانی ئیسرائیل لە باكووری رۆژهەڵاتی كەرتی غەززە، لەمیانەی پێكدادانێكدا لەگەڵ ژمارەیەك چەكدار كە لە خاكی فەلەستینەوە دزەیانكردبوو كوژرا، وەك ئەوەی ئەنجومەنەكە رایگەیاند.
ئەنجومەنەكە لە راگەیەندراوێكدا ئاشكرایكرد، عوفیر لیبشتاین-ی سەرۆكی ئەنجومەنی هەرێمایەتی لە پێكدادانێكی چەكداریدا كوژراوە.
هێزەكانی ئیسرائیل شەڕی مەیدانی دژ بە چەكدارە فەلەستییەكان دەكان لە ناوچەكانی دەوروبەری كەرتی غەززە، پاش دزەكردنەكەیان، وەك ئەوەی وتەبێژی سوپا ئاماژەی پێدا.
بەیانیی ئەمڕۆ باڵی سەربازیی بزوتنەوەی حەماس دەستپێكردنی پرۆسەی “گەردەلولی ئەقسا”ی راگەیاند، كە خۆی لە هەڵدانی مووشەك و دزەكردنی چەكداران بۆ ناو خاكی ئیسرائیل دەبینێتەوە.
لە بەرامبەردا سوپای ئیسرائیل پرۆسەیەكی سەربازی بەناوی “شمشێری ئاسنین” دژ بە حەماس لە كەرتی غەززە دەستپێكرد.
