جێگری سەرۆكی رێكخراوی یەكێتیی مامۆستایانی كوردستان رایدەگەیەنێت، بۆ دەستپێكردنەوەی دەوام مامۆستایان داوای مووچەی مانگی 8 و 9ی دەكەن و دەشڵێت، “مامۆستایان خۆیان بڕیاردەدەن كۆتایی بە بایكۆت بهێنن و ئێمەش پشتیوانی لە داواكارییەكانیان دەكەین”.
عەتا ئەحمەد جێگری سەرۆكی رێكخراوی یەكێتیی مامۆستایانی كوردستان لە لێدوانێكدا بە تۆڕی میدیایی ئێستای راگەیاند، مامۆستایان خۆیان و بەشێك لە لقەكانی یەكێتیی مامۆستایان و مامۆستایانی ناڕازی بڕیاری بایكۆتیان داوە و هەر خۆشیان دەتوانن بایكۆت بشكێنن.
وتیشی، ” حكومەت هیچ هەنگاوێكی نەناوە بۆ داواكاریی مامۆستایان و ئەو پارەیەی لە بەغدادەوە هاتووە بە دوو هەفتە دابەشكراوە بۆیە ئەگەر مووچەی مانگی 8 پێشبخرێت ئەوا كاریگەری لەسەر هەڵوێستی مامۆستایان دەبێت بەو پێیەی مامۆستایان داوای مووچەی مانگەكانی 8 و 9 بەیەكەوە دەكەن و ئێمەش پشتیوانی لە داواكانی مامۆستایان دەكەین”.
