جێگری سەرۆكی رێكخراوی یەكێتیی مامۆستایانی كوردستان رایدەگەیەنێت، چەند جارێك هەوڵیانداوە مووچە و راژەی مامۆستایانی خوێندنی كوردی لە كەركوك و ناوچەدابڕێندراوەكان بخرێتە سەر بەغداد و دەشڵێت، “رۆژی یەكشەممە لە كەركوك گردبوونەوەیەك رێكخرا و ئەو داواكارییە بە نووسراوی فەرمی دراوەتە بەڕێوەبەری پەروەردەی كەركوك و بەڵێنیداوە كاری لەسەر بكات”.
عەبدولواحید محەمەد جێگری سەرۆكی رێكخراوی یەكێتیی مامۆستایانی كوردستان لە لێدوانێكدا بە تۆڕی میدیایی ئێستای راگەیاند، پێشتر چەند جارێك هەوڵماندا كە راژە و مووچەی مامۆستایانی خوێندنی كوردی لە كەركوك و ناوچە دابڕێندراوەكان بخرێنە سەر بەغداد و لەگەڵ سەندیكای مامۆستایانی عێراقیش ئەو پرسە گفتوگۆی لەسەركراوە و لەهەمانكاتدا سەردانی وەزارەتی پەروەردەی عێراقمان كردووە و ئەو بابەتە گفتوگۆی لەسەركراوە كە ژمارەی مامۆستایان و فەرمانبەران لە سنووری ناوچەدابڕێندراوەكاندا زیاترە لە 14 هەزار مووچەخۆر.
ئاشكراشیكرد، رۆژی یەكشەممە لەبەردەم لقی كەركوكی یەكێتیی مامۆستایان گردبوونەوەیەك ئەنجامدراوە بەڕێوەبەری پەروەردەی كەركوك سەردانی كردوون و چەند داواكارییەكی ئاراستەكراوە و یەكێك لە داواكارییەكان ئەوەبووە كە راژە و مووچەی مامۆستایانی خوێندنی كوردی لە كەركوك بخرێتە سەر بەغداو و بەڵێنیدا كار لەسەر داواكارییەكەیان بكات، هەرچەندە پێشتر ئەو پرسە خرایە بەردەم پەرلەمان، بەڵام دەنگی نەهێنا.
