خوێندنی ناوپۆل لە سەرجەم ناوەندەكانی خوێندن لە هەرێمی كوردستان دەستیپێكردەوە و بەرپرسێكی پەروەردەش دەڵێت، لە كۆتایی مانگی داهاتوو كۆتایی بە ساڵی خوێندن دەهێنرێت، پێشبینیش ناكات دووبارە خوێندنی ناوپۆل ڕابگیرێتەوە.
وەك ئەوەی لەلایەن لیژنەی باڵای بەرەنگاربوونەوەی كۆرۆنا و وەزارەتی پەروەردەوە بڕیاری لەسەردرابوو، ئەمڕۆ یەكشەممە 16ی ئایار دەرگای ناوەندەكان بۆ خوێندنی ناوپۆل كرانەوە.
عومەر محەمەد ئەمین، یاریدەدەری بەڕێوەبەری گشتیی پەروەردەی سلێمانی بە تۆڕی میدیایی ئێستای وت، “پێشتر خوێندنی ناوپۆلمان دەستپێكرد، بەڵام لەلایەن لیژنەی باڵای بەرەنگاربوونەوەی كۆرۆناوە بەهۆی زیادبوونی ژمارەی توشبوون ڕاگیرا، لەئێستادا بەهەمان شێوەی پێشوو دەستمان كردەوە بە دەوام و هیچ گۆڕانكارییەكمان نەكردووە”.
وتیشی، وەك ماوەی پێشوو خوێندنی ناوپۆل بەشێوەی نۆرە، سێ ڕۆژ بە سێ رۆژ، ئەمڕۆ لە سەرجەم ناوەندەكان دەوام دەستیپێكردووەتەوە.
عومەر محەمەد ئەوەشی خستەڕوو، لە 22ی حوزەیران دەستدەكەین بە تاقیكردنەوەی كۆتایی وەرز، تاقیكردنەوەكان ماوەی هەشت بۆ 10 ڕۆژ دەخایەنێت و لەگەڵ كۆتایی تاقیكردنەوەكان، كۆتایی بە ئەمساڵی خوێندن دەهێنن.
ئاماژەی بەوەشكرد، بەهۆی ئەوەی هەندێك لە باوانی خوێندكاران ترسیان هەیە لەوەی ئەگەر منداڵەكانیان بنێرنەوە ناوپۆلەكان ئەگەری توشبوونیان بە كۆرۆنا هەیە، بۆیە هاوكات لەگەڵ خوێندنی ناوپۆل، خوێندنی ئەلیكترۆنیش بەردەوام دەبێت.
یاریدەدەری بەڕێوەبەری گشتیی پەروەردە پێشبینی خۆیشی نیشاندا بەوەی، دەستپێكردنەوەی خوێندن تا كۆتایی ساڵ بەردەوام دەبێت و جارێكی دیكە ڕاناگیرێتەوە، بەهۆی ئەوەی ڕێكارێكی توندوتۆڵ دەگرنە بەر، لە هەر شوێنێك گرفت هەبوو تەنها ئەو پۆلە كەرەنتین دەكەن.
