ئەندامێکی کۆنگرەی پێنجەمی یەکێتی رایدەگەیەنێت، “پەیڕەوی ناوخۆ گفتوگۆی زۆری پێویستە و کۆنگرەکە کارەکانی زۆر بە باشی بەڕێوەچووە”.
د.مەجید محەمەد، ئەندامی کۆنگرەی پێنجەمی یەکێتی لە لێدوانێکیدا ئاماژەی بەوەکرد، “یەکێتی حزبێکی سیاسییە و پەیڕەوی ناوخۆ بۆ حزبەکە زۆر گرنگە، لەوەش گرنگتر بەند و ماددەکانی پەیڕەوەکەن چونکە پەیوەندییەکانی نێوان ئەندامان و کادران رێکدەخات”.
ئەوەشی خستەڕوو، “هەموو جارێک پەیڕەوی ناوخۆ گفتوگۆی زۆری پێویست بووە، ئەوەش بەهێزی یەکێتیی نیشتمانیی کوردستان دەردەخات کە بڕوای بە گفتوگۆ و گوێگرتن لە بیروبۆچوونەکان هەیە”.
ئەو ئەندامەی کۆنگرە دەشڵێت، “هەموو کات یەکێتی لە بەرەی خەڵک بووە، یەکێتی لەبەردەم تاقیکردنەوەیەکی قورسدایە و هیچ هەڵبژاردنێکمان لەبەردەمدا نییە بێجگە لە سەرکەوتن”.
