پۆلیسی هەولێر لەبارەی بڵاوبوونەوەی گرتە ڤیدیۆیی لێدان لە گەنجێک لەلایەن چەند پۆلیسێکەوە روونکردنەوەیەکی بڵاوکردەوە و رایگەیاند، ” ئەفسەرێک و ئەو پۆلیسە لەلایەن بەڕێوەبەرایەتیەکەمانەوە دەستبەسەرکراون و لیژنەی لێکۆڵینەوەیان لە سەر پێکهێنراوە”.
بەرێوەبەرایەتیی پۆلیسی هەولێر ئەماژەی بەوەکرد، “لە نێو سەنتەری شار، کۆمەڵێک گەنج لە سەر قەڵای هەولێر بە ئەنجامدانی چەند کردار و ڕەفتارێکی ناشایستە هاووڵاتیانیان ناڕەحەت و بێزارکردبوو، بۆ کۆنتڕۆڵکردنی ئەو بارودوخە، پۆلیس ڕەوانەی شوێنەکە کران، بەڵام بەداخەوە لەلایەن یەکێک لە پۆلیسەکان بەشێوازێکی ناشایستە پەلاماری یەکێک لە گەنجەکان درا”.
ئەوەشی خستۆتەڕوو، “لە بەرامبەر ئەو ڕەفتارە نابەجێیە ئەفسەرێک و ئەو پۆلیسە لەلایەن بەڕێوەبەرایەتییەکەمانەوە دەستبەسەرکراون و لیژنەی لێکۆڵینەوەیان لەسەر پێکهێنراوە و بەپێی یاسا مامەڵەیان لەگەڵدا دەکرێت”.
دەشڵێت، “هاووڵاتییان و هاوشاریانی خۆشەویستی شارەکەمان دڵنیا دەکەینەوە هیچ کەسێک لە سەرووی یاساوە نییە”.
