ئەندامێكی ئەنجومەنی نوێنەرانی عێراق رایدەگەیەنێت، یەكێتی لە عێراقدا رۆڵی گرنگی هەیە و سەردانەكەی قوباد تاڵەبانی بۆ بەغداد فاكتەرێك دەبێت بۆ چارەسەركردنی كێشە هەڵپەسێردراوەكانی نێوان هەرێم و بەغداد.
غەریب ئەحمەد ئەندامی ئەنجومەنی نوێنەرانی عێراق لە لێدوانێكدا بە تۆڕی میدیایی ئێستای راگەیاند، سەردانەكەی جێگری سەرۆك وەزیران بۆ بەغداد ئەوەمان پێدەڵێت كە پێشتر رۆڵی هەبووە لە چارەسەركردنی كێشەكان بەتایبەت پرسی مووچە و بودجە و بە ئومێدەوە دەڕوانینە ئەم سەردانەی قوباد تاڵەبانی و شاندەكە بۆ بەغداد.
ئاماژەی بۆ ئەوەش كرد، بڕیارە ئەو شاندە كە سەردانی بەغداد دەكەن لەگەڵ سەرۆك وەزیرانی عێراق، سەرۆك كۆمار و لیژنەی دارایی و چەندین دیداری گرنگی دیكە ئەنجامبدەن و كاری لە پێشینەیان گفتوگۆكردنە بۆ چارەسەركردنی پرسی مووچە و بودجە و كێشە هەڵپەسێردراوەكانی نێوان هەرێم و بەغداد.
ئەو پەرلەمانتارە جەختیكردەوە، “یەكێتی لە عێراق رۆڵی گرنگی هەیە و سەردانەكەی قوباد تاڵەبانی بۆ بەغداد فاكتەرێك دەبێت بۆ چارەسەركردنی كێشە هەڵپەسێردراوەكانی نێوان هەرێم و بەغداد”.
