ئەندامێكی خولی پێنجەمی پەرلەمانی كوردستان رایدەگەیەنێت، هەر كات بارودۆخ بگاتە بنبەست چوونی قوباد تاڵەبانی بۆ بەغداد دەبێتە زەرورەت و دەشڵێت، “یەكێتی هەموو كات ئامادەیە قوربانی بە خۆی بدات لەپێناوی میللەتەكەیدا”.
شیرین یونس ئەندامی خولی پێنجەمی پەرلەمانی كوردستان لە لێدوانێكدا بە تۆڕی میدیایی ئێستای راگەیاند، هەر كات بارودۆخ بگاتە بنبەست چوونی قوباد تاڵەبانی بۆ بەغداد دەبێتە زەرورەت و جێگری سەرۆك وەزیران هیچ كات سڵی لە چوونی بۆ بەغداد نەكردووەتەوە و هەمووجارەكانیش مەبەستی سەرەكی سەردانەكانی چارەسەركردنی كێشەی مووچەی مووچەخۆران و قووتی هاوڵاتییان بووە.
ئاماژەی بۆ ئەوەش كرد، “هاوڵاتییان دەزانن كە ساڵانی رابردوو جێگری سەرۆكی حكومەت بەردەوام لە هەوڵی چارەسەركردنی كێشەی نێوان هەرێم و بەغداد بووە، یەكێتی هێزێكی كاریگەرە بابەتی مووچەش كە راستەوخۆ پەیوەندیی بە ژیانی مووچەخۆرانەوە هەیە بۆ ئەوەش یەكێتی ئامادەیە قوربانی بەخۆی بدات لە پێناوی میللەتەكەیدا بێگومان هاوشێوەی رابردوو لە داهاتووشدا ئەنجامەكەی دەبینرێت”.
