وتەبێژی كۆنگرەی پێنجەمی یەكێتی دوایین ئامادەكارییەكان بۆ ئەنجامدانی كۆنگرە ئاشكرادەكات.
تەلار لەتیف، وتەبێژی كۆنگرەی پێنجەمی یەكێتیی نیشتمانیی كوردستان رایگەیاند، ئەندامانی هەریەك لە ئەنجومەنی سەركردایەتیی ئێستا و پێشوو، ئەنجومەنی باڵای سیاسی، دەستەی دامەزرێنەران و پێشمەرگەكانی 76 بە راستەوخۆ دەبنە ئەندامی كۆنگرە و پێناسەیان بۆ دەكرێت.
تەلار لەتیف لە لێدوانێكدا بۆ میدیاكانی یەكێتی وتیشی، “لە هەفتەی ئایندەدا كار لەسەر بڵاوكردنەوەی رێنماییەكان دەكرێت دەربارەی چۆنیەتی ئەنجامدانی كۆنفرانسەكان بۆ ئۆرگانەكان لە مەڵبەند و مەكتەبەكان و هەردوو ئەنجومەنی راوێژكاری و پشتیوانیی یەكێتی”.
بڕیارە كۆنگرەی پێنجەمی یەكێتی لە 27ی ئەم مانگە ئەنجامبدرێت. وتەبێژی كۆنگرەی ئەوەی خستەڕوو، یەكەمجارە كۆنگرە لە كاتی خۆیدا ئەنجامدەدرێت.
دووپاتیشیكردەوە، كۆنگرە بە ئاگاداری و سەرپەرشتی كۆمسیۆنی هەڵبژاردن دەبێت و 600 كەس ئەندام دەبن تیایدا.
یەكێك لە كارەكانی كۆنگرە بریتی دەبێت لە هەمواری پەیڕەو و پڕۆگرامی یەكێتی، تەلار لەتیف سەبارەت بە گۆڕانكاری لە هەیكەلیەتی یەكێتی و ژمارەی ئەنجومەنی سەركردایەتیی داهاتوو وتی، هەندێك لیژنە پێكدەهێنرێت بۆ گفتوگۆكردن لەسەری. رای جیاواز هەیە لەسەر ناو، پێكهاتە و ژمارەیان، بەڵام لە رەشنووسی پەیڕەودا یەكلادەكرێتەوە و لەناو كۆنگرەدا پاش گفتوگۆی ئەندامان بڕیاری لەسەر دەدرێت.
روونیشیكردەوە، كۆنگرەی پێنجەم لە سلێمانی ئەنجامدەدرێت و دواتر شوێنی گرێدانی بە دیاریكراوی ئاشكرادەكرێت.
