بەڕێوەبەرایەتیی پۆلیسی راپەڕین رایدەگەیەنێت، لە سنووری ناحیەی چوارقوڕنە ئامێرێكی بیر هەڵكەندن لە كاتی كاركردن دەستی بەسەرداگیرا و چوار كەسیش بەتۆمەتی هەڵكەندنی بیری ئاو بە نایاسایی دەستگیركران.
بەپێی راگەیەندراوێكی بەڕێوەبەرایەتیی پۆلیسی ئیدارەی راپەڕین كە وێنەیەكی دەست تۆڕی میدیایی ئێستا كەوتووە و تێیدا هاتووە، دوای ئەوەی بنكەی پۆلیسی بتوێن لە ناحیەی چوارقوڕنە زانیارییان پێگەیشت كە ئامێرێكی بیر هەڵكەندن بە نایاسایی لەناو زەویەك لە سنوری ناحیەی چواڕقوڕنە كاردەكات و بیرێك هەڵدەكەنێت، دەستبەجێ لەلایەن بنكەی پۆلیسی بتوێن و بە هاوكاریی پۆلیسی فریاكەوتنی راپەڕین هەستان بە دەستبەسەرداگرتنی ئامێرەكە و مۆلیدەیەكی كارەبا كە تەرخانكرابوو بۆ ئامێری بیر هەڵكەندنەكە.
پۆلیسی راپەڕین راشیگەیاندووە، لەگەڵ دەستبەسەرداگرتنی ئامێرەكان، خاوەنی ئامێری بیرهەڵكەندنەكە و سێ كەسی دیكەش دەستگیركران و دوای ئاگادار كردنەوەی دادوەر، دۆسیەی لێكۆڵینەوە كرایەوە و بە بڕیاری دادوەر خاوەنی ئامێری بیر هەڵكەندنەكە و سێ كەسەكە بە پێی ماددەی 240 لە یاسای سزادانی عێراقی راگیران و لێكۆڵینەوەش بەردەوامە.
