بەڕێوەبەری گشتیی بازرگانیی هەرێم رایدەگەیەنێت، دادگای فیدراڵیی عێراق ئەو سكاڵایەی رەتكردەوە كە لەلایەن وەزارەتی بازرگانیی عێراقەوە لەسەر هەرێم تۆماركرابوو تایبەت بە پارەی بەشە خۆراكی 18 ساڵی رابردوو لە هەرێمی كوردستان كە دەبووایە بگەڕێتەوە بۆ حكومەتی فیدراڵ.
ئاماژەی بۆ ئەوەش كرد، داواكە لەسەر ئەو بنەمایە بووە كە هەرێم لە ساڵی 2004ەوە ئەو پارەیەی لە هاوڵاتییانی لەبەرامبەر بەشەخۆراكی مانگانەی هاوڵاتییان وەرگرتووە نەیگەڕاندووەتەوە بۆ بەغداد، لە بەرامبەردا ئێمەش سەرجەم ئەو بەڵگەنامانەمان پێشكەشكرد كە حكومەتی عێراق پاداشتی كارمەندان و كرێی گواستنەوەی نەداوە و ئەو پارەیەی وەرگیراوە لە هاوڵاتییان گەڕێندراوەتەوە بۆ وەزارەتی دارایی ئەوانیش بۆ گواستنەوە و پاداشتی كارمەندان خەرجیانكردووە، هەر بۆیە بڕیارەكەی دادگای فیدراڵیی عێراق لە بەرژەوەندیی هەرێم كۆتاییهات و ئەو دۆسیەیە داخرا.
