سەرلەبەیانی ئەمڕۆ 20 ی ئابی 2023 ، لیوای 22 ی پیادەی وەزارەتی پێشمەرگە، بە ھاوبەشیی سوپای عێراق لە ناوچەی (قەرەحەسەن – لەیلان) ئۆپەراسیۆنێكیان ئەنجامدا.
راگەیاندنی وەزارەتی پێشمەرگە بڵاویكردووەتەوە، ئۆپەراسیۆنەكە لە دوو قۆڵەوە بوو، قۆڵی یەكەم بە بەشداریی سەرجەم یەكەكانی لیوای 22ـی پیادەی وەزارەتی پێشمەرگە بەشداربوون و گوندەكانی (جەوەڵ بۆر، چەمی زەنگەنە، قشڵاخی كۆن، خدر بەگ) و جوگرافیای سنوورەكەیان كێوماڵ كرد.
ئاماژە بۆ ئەوەش كراوە، قۆڵی دووەم، ھێزەكانی لیوای 31 فرقەی 8 ی سوپای عێراق لە بەنداوی شیرینەوە بە ئاڕاستەی (بەرزاییەكانی جەوەڵ بۆر، بەرەو ڕێگای سەرەكی كەركوك – سلێمانی) كێوماڵی ناوچەكەیان كرد.
هەر لە راگەیەندراوەكەدا هاتووە، ئۆپەراسیۆنەكە، بۆ ماوەی حەوت كاتژمێر بەردەوامبوو، تیایدا تەواوی ناوچەی دیاریكراو كێوماڵكرا، كە گومان دەكرا تیرۆریستانی داعش وەك دەرچەیەك ئەو ناوچەیە بەكاریبهێنێن.
