پۆلیسی شاری شتوتگارتی ئەڵمانیا ئاشکرایکردووە گەنجێکی پاکستانی کە وتارخوێنی مزگەوتی ئیبەرزبا‌خ بووە لە پارکێکدا لەلایەن دوو کەسەوە هێرشیکراوەتە سەر و بەچەقۆ کوژراوە.
بەپێی ڕاگەیەنراوی پۆلیس ڕوداوەکە شەوی ڕابردوو 23 ی کانونی یەکەم، ڕویداوە و بەپێی لێکۆڵینەوەی پۆلیس کاتێک ئەو گەنجە پاکستانییە کە پێشنوێژ و وتارخوێنی مزگەوتێک بووە لەگەڵ خێزانەکەی پیاسەیانکردووە لەلایەن دوو کەسەوە بە چەقۆ هێرشکراوەتەسەری و بەهۆی سەختی برینەکەیەوە گیانی لە دەستداوە.
گەنجە پاکستانییەکە تەمەنی 26 ساڵە و وەک ژنە 30 ساڵەکەی ئاشکرایکردووە دوو کەسەکە هێرشیان بۆ هەردووکیان هێناوە، بەڵام تەنها مێردەکەی بە چەقۆ بریندارکراوە.
پۆلیس دەڵێت ئامبوڵانس پاش ماوەیەکی کەم لە ڕوداوەکە گەیشتووەتە شوێنی ڕوداوەکە، ژن و مێردەکەیان گەیاندووەتە نەخۆشخانە، بەڵام بەهۆی قورسی برینەکە و قوڵی جێگە چەقۆکان گەنجەکە گیانی لە دەستداوە.
