لە بەردەوامیی هێرش و مەترسییەكانی داعشدا بۆ كۆنتڕۆڵكردن و دەستبەسەراگرتنی شار و ناوچەكانی كوردستان، لە رۆژێكی وەك ئەمڕۆدا هێزەكانی دژەتیرۆر و پێشمەرگەكانی یەكێتی، چەكدارانی رێكخراوەكەیان راوەستاند و یەكەم سەركەوتنیان بەسەردا تۆماركردن.
ئەمڕۆ 10ی ئاب نۆ ساڵ بەسەر ئازادكردنی شارۆچكەی مەخمور لە چنگی چەكدارانی داعش تێدەپەڕێت، كە هێزەكانی دژەتیرۆر و پێشمەرگەكانی یەكێتیی نیشتمانیی كوردستان بە سەرپەرشتیی راستەوخۆی بافڵ جەلال تاڵەبانی ئەنجامیاندا.
بەر لەو رۆژە نەك تەنها مەخمور، بەڵكو هەولێر-یش لە بەردەم مەترسیی گروپە تیرۆرستییەكاندا بوو، خەڵك بە لێشاو هەڵهاتن، بەهۆی ئەوەی پێشتر هەڵهاتنی پێشمەرگەكانی پارتی-یان لە شەنگال بینیی بوو، بەڵام ئەمجارە دژەتیرۆر و پێشمەرگەی یەكێتی هاوكێشەكەیان پێچەوانە كردووە، مەخمور رزگاركرا و هەولێریش بە پارێزراوی هێڵدرایەوە.
دەربارەی وردەكاریی جوڵەپێكردنی هێزەكانی دژەتیرۆر، مەلا بەختیار، ئەندامی ئەنجومەنی باڵای سیاسی و بەرژەوەندیی یەكێتی لە نووسینێكدا دەڵێت، دوای ئەوەی ئاگاداركراینەوە كە هەولێر لە مەترسیدایە، دەستبەجێ لەگەڵ برادەرانی دژەتیرۆر قسەمان كرد، ئەوان ئامادەبوون بێن و كەوتینەڕێ.
دەشڵێت، “لەبیرمە كە چوینە هەولێر و لە پردێ تێپەڕین، بە هەزاران سەیارە و خێزان رایاندەكرد، لەو قۆڵە و لە قۆڵەكانی تریشەوە خەڵك لە هەولێر رایاندەكرد، كە هێزەكانی دژەتیرۆریان بینی بەو حەماسە و بەرزكردنەوە ئاڵای كوردستان و یەكێتی، بیستم كە ورەی خەڵك بەرزبووەوە نیوەی ئەوانەی رایانكردبوو گەڕانەوە”.
لەبارەی مەترسی داگیركردنی هەولێریش لەلایەن داعشەوە، مەلا بەختیار باسی ئەوە دەكات كە دوای چوونیان بۆ هەولێر لەگەڵ مەكتەبی سیاسی پارتی كۆبوونەتەوە و لە كۆبوونەوەكەدا دڵنیایان داوەتە مەسعود بارزانی و دەڵێت، “بە كاك مەسعودم وت ئەوە دژەتیرۆر هاتووە بۆ هەولێر و دڵنیابە ناهێڵین داعش هەولێر داگیربكات هێزێكی دژەتیرۆری ئەوەندەمان هەیە دەتوانین بیانشكێنین و دەشبێت بچین پەلاماری مەخمور بدەین”.
سەبارەت بە ئازادكردنی مەخموریش مەلا بەختیار رایگەیاند، كاتێك گەیشتینە مەخمور دژەتیرۆر شەڕێكی قارەمانانەیان تۆماركرد، بەڕاستی قارەمانیەتی لەوە زیاتر نابێت كە دژەتیرۆر و پێشمەرگە لە مەخمور دژی داعش تۆماریكرد، كە دژەتیرۆر سایلۆكەی مەخموری گرت، تەپڵی سەركەوتن لە مەخمور لێدرا.
هەر لەبارەی ئەو شەڕەوە لیوا ئەیوب یوسف، سەرپەرشتیاری لیوای 3 و 7ی تایبەت دەڵێت، لەو رۆژەدا داعش بە هێزێكی زۆرەوە دژە هێرشی ئەنجامدا و بەشێكی زۆری هێز و لیواكان كشانەوە “ئێمە نەبێت كە بەهیچ شێوەیەك پاشەكشەمان نەكرد و داعشمان بەزاند”.
دەشڵێت، هێزەكانی دژەتیرۆر و چەندین لیوای پێشمەرگە بەشداری ئەو شەڕەیان كرد و رۆڵی گرنگیان هەبوو.
لە ساڵیادی رزگاركردنی مەخموردا هێزەکانی دژە تیرۆر_CTG بڵاویکردەوە، “بەر لە 9 ساڵ و لە رۆژێکی وەک ئەمڕۆدا، هێزەکانی دژەتیرۆر داستانێکی بێوێنەیان تۆمارکرد، کاتێک هەمووان دەستەوەستان بوون و چەندین ناوچە بێ بەرگری رادەستی رێکخراوی تیرۆرستیی داعش کرابوون و تەنها چەند کیلۆمەترێک لەنێوان رێکخراوەکە و هەولێری پایتەختدا هەبوو، هێزەکانی دژەتیرۆر توانیان شارەکە بپارێزن و شارۆچکەی مەخمور بە کەمتر لە کاتژمێرێک کۆنتڕۆڵ بکەنەوە”.
هەر لە راگەیەندراوەکەدا هاتووە، “دژەتیرۆر_CTG، ئەو هێزەیە کە خۆی بە بەرپرسیار دەزانێت بەرامبەر پاراستنی بست بە بستی خاکی کوردستان و قوربانیدانی هێزەکانی دژەتیرۆر لە ناوچە جیاوازەکانی کوردستان شایەتی ئەو راستییە”.
