بافڵ تاڵەبانی، هاوسەرۆكی یەكێتی سەردانی كۆسرەت ڕەسولی كرد، هەردوولا بارودۆخی هەرێم و عێراق و ناوچەكەیان تاووتوێكرد.
بەگوێرەی ڕاگەیەندراوی كۆبوونەوەكە، سەرلەبەیانیی ئەمڕۆ پێنجشەممە 24ی كانونی یەكەم، لە شاری سلێمانی كۆسرەت ڕەسول عەلی، سەرۆكی ئەنجومەنی باڵای سیاسی و بەرژەوەندیی یەكێتیی نیشتمانیی كوردستان پێشوازی لە بافڵ تاڵەبانی، هاوسەرۆكی یەكێتیی نیشتمانیی كوردستان كرد.
ئەوەش خراوەتەڕوو، لە دیدارەكەدا گفتوگۆ لەبارەی دۆخی ناوخۆی كوردستان و گۆڕانكارییەكانی ناوچەكە كراوە، كۆسرەت ڕەسول ئاماژەی بۆ ئەوەكردووە، “دەبێت یەكێتی ڕۆڵی گرنگ و یەكلاكەرەوە لە پرسەكان بگێڕێت و لەپێناو بەرژەوەندییە باڵاكانی گەلەكەمان هەوڵەكانی بخاتەگەڕ بە ئاڕاستەی چاككردن و باشتركردنی دۆخەكە”.
بافڵ تاڵەبانی، هاوسەرۆكی یەكێتیی نیشتمانیی كوردستان پوختەی سەردان و كۆبوونەوەكانی ئەمدواییەی وەفدی یەكێتی و گۆڕانكاری و پێشهاتەكانی خستوەتەڕوو، گفتوگۆش لەبارەی پەیوەندییەكانی نێوان هەرێم و بەغداد كراوە.
هەردوولا كۆك بوون لەسەر ئەوەی، “پێویستە حكومەتی هەرێم و بەغداد بگەنە ڕێككەوتنێكی گشتگیر و لێكتێگەیشتنی هاوبەشییان هەبێت بۆ پرسەكان”.
