وەزارەتی کشتوکاڵی هەرێمی کوردستان رایگەیاند کە لقەکانی ماکدۆناڵدز لە وڵاتانی کەنداو داواکاری کردووە بۆ هەناردەکردنی پەتاتەی کوردستان.
بەپێی راگەیەندراوی وەزارەتی کشتوکاڵی هەرێمی کوردستان، “لەچێوەی هەوڵە بەردەوامەکانی وەزارەتی کشتوکاڵ و سەرچاوەکانی ئاو، بۆ دابینکردنی ئاسایشی خۆراک و بەبازاڕکردن و هەناردەکردنی بەرهەمەکانی جوتیاران بۆ بازاڕەکانی دەرەوەی هەرێمی کوردستان، لەئێستادا ئامادەکاری دەکرێ بۆ هەناردەکردنی سەدان تۆن پەتاتە بۆ وڵاتانی کەنداو و ئوردن لەسەر داخوازی لقەکانی ماکدۆناڵدز بۆ بەپیشەسازیکردنی پەتاتە و دروستکردنی چپس و فینگەر”.
ئاماژە بەوەشکراوەکە بەهۆی پاڵپشتیەکانی جوتیاران لە پێشخستنی شێوازی بەرهەمهێنانی جۆرەکانی پەتاتە ، ئەمساڵ پێشبینیکراوە کە هەرێمی کوردستان بگاتە لوتکەی بەرهەمهێنان و زیاتر لە (600) هەزار تۆن پەتاتەی خواردن و (150) هەزار تۆن پەتاتەی پیشەسازی بەرهەمبێت.
بەپێی راگەیەندراوەکە، لەسەر ئاستی ناوخۆی هەرێمی کوردستان بەهۆی پێگەیشتنی وەرزی پەتاتەی خۆماڵی، هاوردەکردنی پەتاتە لە دەرەوە قەدەغەکراوە، تاوەکو کۆتایی ئەمساڵ.
