ماوەی چوار رۆژە ئاگر لە کەشتییەکی بارهەڵگر لە نزیک دوورگەی تێچیلینگ لە باکووری هۆڵەندا کەوتووەتەوە و تا ئێستا نەتوانراوە کۆنتڕۆڵبکرێت.
شەوی سێشەممە لەسەر چوارشەممەی هەفتەی رابردوو، کەشتییەکی بارهەڵگری تایبەت بە کۆمپانیای شۆی کەیسۆن کاشیا کە کێشی نزیکەی 18 هەزار و 500 تۆن بووە و سێ هەزار و 873 ئۆتۆمبێلی هەڵگرتبوو، کە نزیکەی 500 ئۆتۆمبێلیان کارەبایی بوون، ئاگر لە پاتری یەکێک لە ئۆتۆمبێلەکان کەوتەوە و ئاگرەکە بە خێرایی تەشەنەی سەند.
کەشتییەکە لە ئەڵمانیاوە بەرەو بەندەری پۆرسەعیدی میسر بەڕێکەوتووە و بەپێی زانیارییەکان ژمارەیەک ئۆتۆمبێل سووتاون و ئاگرەکەش بەردەوام لە تەشەنەسەندندایە.
بە وتەی تیمە فریاگوزارییەکان تا ئێستا پلەی گەرمای ناو کەشتییەکە زۆر بەرزە و کۆنتڕۆڵکردنی ئاگرەکە قورسە ئاوێکی زۆریش چووەتە ناو کەشتییەکەوە.
سووتانی ئۆتۆمبێلەکانی ناو کەشتییەکە مەترسی کارەساتێکی گەورەی ژینگەیی دروستکردووە و تیمە فریاگوزارییەکانی هۆڵەنداش هەوڵەکانیان خستووەتە گەڕ تا بتوانن رێگری لێبکەن.
