لە رووداوێکی ئاگرکەوتنەوەدا لە رووباری دیجلە شەش لەو بەلەمانە سووتان کە وەک تاکسی کاریان پێدەکرا.
بەڕێوەبەرایەتیی بەرگری شارستانی بەغداد بڵاویکردەوە، “بەیانی ئەمڕۆ لە نزیک مەدینە توبی ناوەڕاستی بەغداد ئاگر لە یەکێک لەو بەلەمانە کەوتووەتەوە کە وەک تاکسی لەناو رووباری دیجلە کاریان دەکرد”.
ئاماژەی بەوەشکرد، “لە رووداوەکەدا شەش بەلەمی تاکسی سووتاون، بەڵام هیچ زیانێکی گیانی بەدواوە نەبووە، لێکۆڵینەوە لە رووداوەکە دەستیپێکردووە”.
لە مانگی شوباتی ئەمساڵ وەزارەتی گواستنەوەی عێراق ژمارەیەک بەلەمی تاکسی لە رووباری دیجلە بە شێوەی ئەزموونی خستەکار، تا هاتوچۆ لەنێوان بەری کەرخ و رەسافەی شاری بەغداد بە هاوڵاتییان بکەن.
بەپێی ئەو زانیارییانەی بەشێک لە میدیا عێراقییەکان بڵاوکراوەتەوە، ئاگرەکە لە بزوێنەری یەکێک لەو بەلەمانە دروستبووە و بۆ ئەوانی دیکەش گواستراوەتەوە.
