هێزەکانی دەزگای ئاسایشی هەرێم، ئەندامانی گروپێکی چەکداری نایاساییان دەستگیرکرد کە ناویان لەخۆیان نابوو (فەوجە خۆبەخشەکەی گەرمیان).
دەزگای ئاسایشی هەرێم رایگەیاند، ئەمڕۆ هێزەكانیان دوای رووبەڕووبوونەوە ئەندامانی گروپێكی چەکداری نایاساییان دەستگیركرد كە ببونەهۆی پشێوی و نائارامی لە ناوچەکە و هەستاون بە (خۆنمایشکردن، وەرگرتنی سەرانە، هەڕەشەکردن، تەقەکردن و تۆقاندنی هاوڵاتیان).
ئەوەشی خستەڕوو، لە کاتی دەستگیرکردنی چەکدارەکاندا، رووبەڕووی هێزەکانی ئاسایش بوونەوە، لە ئەنجامدا دوو کارمەندی ئاسایش برینداربوون، هەروەها دووان لە چەکدارەکان برینداربوون و یەک چەکداریش گیانیلەدەستدا.
دەزگای ئاسایشی هەرێم ئاماژەی بەوەشكرد، ئەندامانی گروپەكە بە فەرمانی دادوەر و بە ماددەی 156 لە یاسای سزادانی عێراقی دەستگیرکراون و رووبەڕووی یاسا کرانەوە.
