وەزارەتی كارەبای هەرێم رایدەگەیەنێت، بەهیچ شێوەیەك گۆڕانكاری لە نرخی كرێی كارەبا لەسەر هاوڵاتییان نەكراوە و تەنها ئەو یەكە نیشتەجێبووانەی بە High Cost ناسراون، لە چوارچێوەی پڕۆژەیەكی نموونەیی ئەزموونەییدا كارەبایەكی 24 كاتژمێرییان بۆ دابینكراوە و چاودێریی دەرئەنجامەكانیشی دەكرێت.
بەپێی راگەیەندراوێكی وەزارەتی كارەبای هەرێم كە وێنەیەكی دەست تۆڕی میدیایی ئێستا كەوتووە و تێیدا هاتووە، هەندێك پەیجی سۆشیاڵ میدیا بۆ لاڕێدا بردنی ڕای گشتی دەستیان بە بڵاوكردنەوەی هەواڵی بێبنەما و ناڕاست لەبارەی كرێی كارەبا كردووە.
لە راگەیەندراوەكەدا هاتووە، وەزارەتی كارەبا، هاوڵاتییان و هاوبەشانی كارەبا بە هەموو پۆلەكانییەوە دڵنیادەكاتەوە بە هیچ شێوەیەك گۆڕانكاری لە نرخی كارەبا نەكراوە و تەنها ئەو یەكە نیشتەجێبووانەی بە High Cost ناسراون، لە چوارچێوەی پڕۆژەیەكی نموونەیی ئەزموونەییدا كارەبایەكی 24 كاتژمێرییان بۆ دابینكراوە و چاودێریی دەرئەنجامەكانیشی دەكەین و بۆ پشتڕاست كردنەوەی ئەم بابەتە، بووەتە بڕیار و لە وەقايئعی كوردستان بڵاوكراوەتەوە.
لە راگەیەندراوەكەدا هاتووە، وەزارەتی كارەبا بە مافی خۆی دەزانێت سكاڵا لەسەر ئەوانە تۆماربكات هەواڵ و زانیاریی ناڕاست و مەبەستدار لەبارەی كار و چالاكییەكانی ئەم وەزارەتە خزمەتگوزارییە بڵاودەكەنەوە.
