فیلێک کە لە چەند ساڵی رابردوودا وەک دیاری لەلایەن تایلاندەوە پێشکەش بە سریلانکا کرابوو بووەتە هۆی دروستبوونی کێشەیەکی گەورەی دیپلۆماسی لەنێوان هەردوو وڵات.
فیلەکە ناوی مۆسۆ راجایە و تەمەنی 29 ساڵانە، لە ساڵی 2001 تایلاند وەک دیاری پێشکەش بە سریلانکای کرد و گواسترایەوە بۆ پەرستگایەکەی بووزییەکان لەو وڵاتە.
لە ماوەی ئەو چەند ساڵەی لە پەرستگاکەدا بووە فیلەکە پشتگوێ خراوە و چاودێری پزیشکی نەکراوە بەو هۆیەوە تووشی چەند نەخۆشییەک بووە، ئەمەش بە وتەی بەرپرسانی تایلاند.
لەسەر بڕیاری حکومەتی تایلاند فیلەکە بە فڕۆکەیەکی بازرگانی گواسترایەوە بۆ وڵاتەکەی خۆی، کە تێچووی گەشتەکەی و چارەسەرییە پزیشکییەکانی 700 هەزار دۆلار بوو.
