شەپۆلێکی سکچوون و رشانەوە لەناو منداڵانی سلێمانیدا بڵاوبووەتەوە و بەڕێوەبەری نەخۆشخانەی منداڵانی سلێمانیش دەڵێت، شەپۆلەکە چاوەڕوانکراوبووە و ساڵانە بەهۆی گەرماوە سەرهەڵدەداتەوە، بەڵام هێشتە بەراورد بە پار ساڵ ژمارەکە کەمترە.
دکتۆر پشدەر عەبدوڵا بەڕێوەبەری نەخۆشخانەی منداڵانی سلێمانی بە تۆڕی میدیایی ئێستای راگەیاند، “شەپۆلی سکچوون و رشانەوە ساڵانە بەهۆی گەرماوە سەرهەڵدەداتەوە و شتێکی ئاساییە، پێشتریش لەوبارەیەوە هۆشداریمان دابوو”.
سەبارەت بە رێژەی تووشبوون وتی، لەگەڵ ئەوەی لە ماوەی رۆژانی جەژندا زیاتر لە 500 منداڵ سەردانی نەخۆشخانەکەیان کردووە و زیاتر لە نیوەشی سکچوون و رشانەوە بوون و داخڵکراون بۆ چارەسەر، بەڵام هێشتا رێژەکە بەراورد بە ساڵی رابردوو کەمترە.
ئاماژەی بە هۆکارەکان کرد کە سەرچاوەی ئاوی پیس، گەرمای زۆر و سەوزە و خۆراکی پیس، ئامادەکردنی خواردن تەنها بۆ یەک ژەم و دووبارە گەرمنەکرێتەوە، دەست شتن بەر لە نانخواردن و دوای نانخواردن، پاکوخاوێنی تەوالێت و گەرماو هۆکارن بۆ تووشبوونی منداڵان بە سکچوون و رشانەوە.
داواشی لە دایکان و باوکان کرد کە زۆر ئاگاداری هۆکارەکان بن بۆئەوەی رێژەکە زیاتر بەرزنەبێتەوە، وتی، “بەداخەوە دایکان و باوکان هۆکارن بۆ دروستبوونی مەترسی لەسەر ژیانی منداڵان، چونکە دەیانبەن بۆ شوێنی هەڵە و چارەسەری هەڵەیان پێدەدەن”.
