بەشی پۆلیسی دارستان و ژینگەی پارێزگای سلێمانی رایدەگەیەنێت، كەسێك بە تۆمەتی كەوتنەوەی ئاگر و سووتاندنی هەزاران دۆنم لە پووش و پاوان و دارستان و باخی هاوڵاتییان لە سنووری قەزای شارباژێر دەستگیركرا.
بەپێی راگەیەندراوێكی بەشی پۆلیسی دارستان و ژینگەی پارێزگای سلێمانی كە وێنەیەكی دەست تۆڕی میدیایی ئێستا كەوتووە و تێیدا هاتووە، لە چەند رۆژی رابردوودا ئاگرێكی فراوان سنووری شارباژێڕی گرتەوە و بووە هۆی سووتانی هەزاران دۆنم لە پووش و پاوان دارستان و باخی هاوڵاتییان، بەشی پۆلیسی دارستان و ژینگەی شارباژێڕ دوای ئەوەی هەموو هەوڵی خۆیان خستەكار و لەگەڵ لایەنە پەیوەندیدارەكانی قەزای شارباژێڕ و هاوڵاتییانی سنوورەكە توانیان ئاگرەكە كۆنتڕۆڵبكەن.
لە راگەیەندراوەكەدا هاتووە، بە مەبەستی لێكۆڵینەوە بەدواداچوون بۆ هۆكاری ئاگرەكە و دۆزینەوەی كەسی تۆمەتبار پەڕاوی لێكۆڵینەوەیان رێكخرا و دەستكرا بە لێكۆڵینەوە و بەدواداچوون، لە ئەنجامدا توانیان كەسێك بە تۆمەتی هۆكاری ئاگرەكە دەستگیربكەن كە لە ئێستادا بە بڕیاری دادەوەر دەستبەسەرە.
