ئەگەر فیدراسیۆنی تۆپی پێی ئەوروپا سزای دوورخستنەوە لە پاڵەوانێتییە ئەوروپییەکان بەسەر یانەکانی بەرشلۆنە و یوڤانتۆس-دا بسەپێنێت، دەسەڵاتی وەرزشیی سعوودیە هەردوو یانەکە لە خولێکی جیهانی دیکەدا کۆدەکاتەوە.
ڕۆژنامەی “توتۆ سپۆرت”ی ئیتاڵی بڵاویکردووەتەوە، دوای گواستنەوەی کریستیانۆ و بنزیمە و چەندین یاریزان بۆ خولی ڕەوشەن، دەسەڵاتی وەرزشیی شانشینی سعوودیە بیر لە سازکردنی مۆندیالی 2030 دەکاتەوە، بۆ ئەو مەبەستەش پێویستیان بە هەنگاونانی فراوانترە.
لە ئەگەری سزادانی بەرشلۆنە و یوڤانتۆس لەلایەن (یوێفا)وە، سعوودیە پێشنیازی سازکردنی خولی “سوپەرلیگ” بە بەشداریکردنی بارسا و یوڤێ و یانەکانی سعوودیە کراوە.
بەگوێرەی زانیارییەکان، سندووقی وەبەرهێنانی سعوودیە سەرپەرشتیی دارایی خولەکە دەکات، جگە لە پاداشتی خەیاڵی بۆ دوو یانە گەورەکەی ئەوروپا، بڕیارە یانەی دیکە لە دەرەوەی ئەوروپاوە بانگهێشتبکەن.
