بازرگانێک لە عەلوەی سلێمانی بڕی یەک ملیار دیناری ژمارەیەک دوکانداری عەلوەی سلێمانی بە قەرز وەردەگرێت و هەڵدێت.
سەروەر عەلی سەرۆکی سەندیکای عەلوەی سلێمانی بە تۆڕی میدیایی ئێستای راگەیاند، ئەو کەسە لە ساڵی 2012وە لەناو عەلوەی سلێمانی کاردەکات، میوە و سەوزەی لای دوکاندارەکانەوە بە قەرز بردووە و لە شوێنی دیکە فرۆشتوویەتی.
ئاماژەی بەوەکرد، خەڵکێکی زۆر هەن کە بەوشێوەیە لە عەلوەی سلێمانی کاردەکەن، بەڵام تا ئێستا کەس نەبووە قەرزەکان نەداتەوە و هەڵبێت.
بەپێی وتەی سەرۆکی سەندیکای عەلوەی سلێمانی، ئەو کەسە بە رەگەز عەرەبە و بڕی ئەو پارەیەی بردوویەتی زیاترە لە یەک ملیار دینار کە هی پەنجا دوکاندارە.
دەڵێت، “سکاڵامان لەسەر ئەو کەسە تۆمارکردووە و ئاسایشی سلێمانی ئاگاداریان کردوویەنەتەوە کە رۆژی سێشەممە بچینە ئەوێ بۆ تەواوکردنی رێکارەکان”.
