لەبارەی دابەشكردنی مووچەی مانگی پێنجی سەرجەم وەزارەت و دەستەكان بەر لە جەژنی قوربان روونكردنەوە دەدرێت و بەڕێوەبەری یەكێك لە گەنجینەكانی سلێمانیش دەڵێت، “لیستی مووچەمان ئامادەیە و چاوەڕوانی بڕیاری كۆتایی وەزارەتی دارایی دەكەین”.
بەپێی ئەو زانیارییانەی بە تۆڕی میدیایی ئێستا دراون، لە ئێستادا خشتەی مووچە رانەگەیەنراوە و تەنها وەزارەتی تەندروستی بۆ دابەشكردنی مووچە دیاریكراوە و بەو ماوەیەی كە ماوە ئەگەر خشتەی مووچەش رابگەیەندرێت ناتوانرێت بەر لە جەژن مووچەی سەرجەم مووچەخۆران دابەشبكرێت بەوپێیەی ژمارەی خانەنشینان كە بەسەر بانكەكاندا دابەشكراون زۆرن و بەشێكی دەكەوێتە دوای پشووەكانی جەژنی قوربانەوە.
لای خۆشییەوە حەسەن رەشید، بەڕێوەبەری گەنجینەی یەك لە سلێمانی لە لێدوانێكدا بە تۆڕی میدیایی ئێستای راگەیاند، لیستی مووچەی مانگی پێنج ئامادەكراوە و بۆ دابەشكردنی مووچەی تەواوی فەرمانگەكان چاوەڕوانی بڕیاری وەزارەتی دارایی دەكەین.
