وادەی مامەڵە و وەرگرتنی تێچووی حەج درێژكرایەوە و بەڕێوەبەرایەتیی حەج و عومرە دەڵێت، هەر كەس لە وادەی دیاریكراودا سەردانیان نەكات بێبەش دەبێت.
بەڕێوەبەرایەتیی گشتیی حەج و عومرە لە راگەیەندراوێكدا ئاگاداری سەرجەم ئەو هاوڵاتییانە دەکاتەوە کە ناویان بۆ پرۆسەی حەجی ئەمساڵ 2024 دەرچووە، وادەی تەواوکردنی مامەڵەکان و وەرگرتنی تێچووی حەج تا رۆژی پێنجشەممە 22ی شوبات درێژدەكرێتەوە.
دەشڵێت، لە دوای ئەو رێكەوتەوە بەهیچ شێوەیەک وادەی تەواوکردنی مامەڵەکان و وەرگرتنی تێچووی حەج درێژناکرێتەوە.
بەڕێوەبەرایەتییەكە روونیشیدەكاتەوە، هەر کەسێک لە ماوەی دیاریکراودا سەردانی نووسینگەکانی حەج و عومرەی پارێزگا و ئیدارە سەربەخۆكانی سەر بە بەرێوەبەرایەتیی گشتییان نەکات بۆ تەواوکردنی مامەڵەکانی و پێدانی تێچووی حەج، ناوی یەدەگ لە شوێنی دادەنرێت و مافی بەشداریکردنی لە پرۆسەی حەج نامێنێت.
