گوتی هاس، ئەستێرەی دێرین و ڕاهێنەری پێشووی لاوانی ڕیاڵ مەدرید جەخت لەوە دەکاتەوە، کە یانەی شاهانە دەبێت بە زووترین کات گرێبەستی کیلیان مباپێ واژۆ بکات، بەپێچەوانەشەوە دۆخەکە خراپتر دەبێت.
لە میانی بەشداریکردنی بە پرۆگرامی “ئیل شێرینگیتۆ”ی ئیسپانیدا، گوتی سەبارەت بە بابەتی کیلیان مباپێ دەڵێت، “پێویستە مەدرید ڕووەو فەرەنسا و ماڵی مباپێ هەنگاو بنێت، پێویستە بە خێرایی ئەو بۆشاییە پڕبکاتەوە کە ڕۆیشتنی کەریم بنزیمە لە پێکهاتەی یانەکە دروستیکردووە.”
هەروەها دەڵێت، “دوای نامەکەی مباپێ بۆ پاریس و بە ئاشکرا ڕاگەیاندنی نوێ نەکردنەوەی گرێبەستەکەی، دۆخەکە لەدەست دەرچووە، ئێستا ڕیاڵ دەتوانێت بیکڕێت، بە ڕای من کاتی ئەوەیە 200 ملیۆنەکە بە پاریس بدەن و هەموو شتێک یەکلایی بکەنەوە.”
گوتی لە هەڵوێستەکانیدا تەنها نەبوو، بەڵکو چەندین ڕۆژنامەنووسی وەک جوسێپ پێدرۆرێڵ و ئیدو ئاگێریی ڕۆژنامەنووسانی نزیک لە ڕیاڵ مەدرید هاوڕای بوون.
