ڤیکتۆر فۆنت، پاڵێوراوی پێشوو بۆ پۆستی سەرۆکی بەرشلۆنە و ڕکابەری خوان لاپۆرتا، لە نوێترین چاوپێکەوتندا هۆشداری بە ئیدارەی یانە کەتەلۆنییەکە و هاندەران دەدات.
فۆنت چاوپێکەوتنێکی لەگەڵ ڕۆژنامەی مارکا ئەنجامداوە، تیایدا ئاماژەی بە خراپی دۆخی دارایی یانەی بەرشلۆنە کردووە و دەڵیت، “مێسی نەگەڕایەوە، ئەوەش ئاماژەیە بۆ لەدەستدانی داهێنان و سەرکردایەتی کارای ئیدارەی بارسا.”
هەروەها دەڵێت، “دڵەڕاوکێمە، دڵەڕاکێکەشم بەهۆی دۆخی دارایی یانەکەیە کە لە ماوەی دوو ساڵ و نیوی ڕابردوودا ملیارێک و 500 ملیۆن یورۆ زیانمان بەرکەوتووە بە بەرزکردنەوەی داراییەکانیشەوە، لەڕاستیدا هەموو داهاتەکان کەمیانکردووە و لە هەموو لایەکەوە زیانمان بەرکەوتووە، ئەوەی لاپۆرتا دەیکات ڕەنگە خراپتر بێت لەوەی بارتۆمیو کردوویەتی.”
فۆنت لە کۆتاییدا ئامۆژگاری لاپۆرتا و هاوکارەکانی دەکات بۆ ئەوەی شەفاف بن لە بڵاوکردنەوەی زانیارییە داراییەکان، بەهیچ شێوەیەکیش بەڵێن نادات جارێکی دیکە خۆی بۆ پۆستی سەرۆکایەتی بارسا کاندید بکاتەوە.
