فەرمانگەی تەندروستیی کەرکوک، لەبارەی دەنگۆی بڵاوبوونەوەی ڤایرۆسی ئیبۆلا لە شارەکە روونکردنەوەیەکی بڵاوکردەوە و رایگەیاندووە، “هیچ حاڵەتێکی ڤایرۆسەکە تۆمارنەکراوە”.
لە راگەیەندراوێکدا فەرمانگەی تەندروستیی کەرکوک بڵاویکردەوە، “ئەو هەواڵانەی باس لە بڵاوبوونەوەی ڤایرۆسی ئیبۆلا دەکەن دوورن لە راستییەوە و هیچ حاڵەتێکی ڤایرۆسەکە لە کەرکوک تۆمارنەکراوە”.
تەندروستیی کەرکوک راشیگەیاندووە کە رێکاری یاسایی دەگرنە بەر دژی ئەوانەی ئەو هەواڵە ناڕاستەیان بڵاوکردووەتەوە.
دوێنی هەینی لە بەشێک لە میدیاکان و تۆڕە کۆمەڵآیەتییەکان دەنگۆی ئەوە بڵاوکرایەوە کە حاڵەتێکی توشبوون بە ڤایرۆسی (ئیبولا) لە پارێزگای کەرکوک تۆمارکراوە، بەڵام تەندروستیی کەرکوک ئەو هەواڵە رەتدەکاتەوە.
