نەزهەت حالی بەرپرسی پێشووی دەزگای پاراستنی پارتی دیموکراتی کوردستان رایگەیاند، “زۆر باوەڕم بە توانای کەسانی نیشتمانپەروەر و ئازا هەیە کە رێگە نەدەن ئەو هەرێمە و ئەو حوکمڕانییەمان نەک بەرەو نەمان بچێت بەڵکو بکەوێتە سەر رێگای راست و بە راستی ببێتە هەرێمێکی بەهێزی پێشکەوتوو کە تیایدا بە کردەیی یاسا سەروەر بێت و دامەزراوەکانی نیشتمانی بن و بۆ بەرژەوەندیی گشتی کاربکەن”.
ئەو بەرپرسەی پێشووی پاراستن باس لەوە دەکات کە کەسانی نیشتمانپەروەر و دڵسۆزان دەتوانن بە ئازایانە رێگە لە “سیاسەتی چەوت و هەڵەکانی حوکمڕانی بگرن، دەتوانن رێگەی لەو هزرە مەترسیدارە بگرن کە لە سەری هەندێک کەسدایە و پێیانوایە ئەگەر حوکمڕانی بۆ ئەوان نەبێت نابێت بۆ کەسی تربێت”.
راشیگەیاندووە، ئەو باوەڕە پێچەوانەی باوەڕی شۆڕشگێڕان و ئەو شەهیدانەیە کە گیانیان بەخشی و نەمانی خۆیان ویست و ئازادی و سەربەستییان بۆ گەل ویست.
دەڵێت، مێژوو سەلماندویەتی دەسەڵات لەسەر ناوی کەس تاپۆ نیە، میزان و پێوەر را و بڕیار گەلە، هەر بۆیە گرنگ شێوازی حوکمڕانی کردن و ئەنجامەکەیەتی بۆ خێر و خۆشی و پێشکەوتنی گەل.
