فراكسیۆنی یەكێتی لە ئەنجومەنی نوێنەرانی عێراق رایدەگەیەنێت، یەكێتی حزبی ڕەچەشكێنی و بەرپرسیارێتییە سەختەكان و ئەركە مێژووییەكانە.
لەپەیامێكیدا بەبۆنەی ساڵیادی دامەزراندنی یەكێتیییەوە، فراكسیۆنی یەكێتی لە ئەنجومەنی نوێنەران راگەیەندراوێكی بڵاوكردەوە و رایگەیاند، “یەكێتی حزبی ڕەچەشكێنی و بەرپرسیارێتییە سەختەكان و ئەركە مێژووییەكانە”.
هەر لە پەیامەكەیدا هاتووە، پیرۆزبایی یادی 48 ساڵەی دامەزراندنی یەكێتی و 47 ساڵەی هەڵگیرساندنی شۆڕشی نوێی گەلەكەمان لە كەسوكاری سەربەرزی شەهیدان و پێشمەرگە دێرینەكان و تێكۆشەران و كادران و جەماوەری خۆراگری یەكێتی دەكەین و ئەم یادە، بۆنەیەكی مێژوویی بەشكۆیە لە مێژووی گەلەكەمان و رووداوێكی گرنگ و دەگمەنی كوردایەتیشە، كە لە هەلومەرجێكی سەختدا، یەكێتی دامەزرا و شەوەزەنگی كوردەواری رووناككردەوە.
داواشدەكات، “لەم یادە مەزنەدا، لەئاست گڵكۆی مامی گەورە و رابەرمان و هەموو شەهیدانی یەكێتی و كوردستان سەری رێز دائەنەوێنین و بەڵێن دووپاتدەكەینەوە لەسەر رێگا و رێبازی یەكێتی و فەلسەفە و ئەزموونی بە بەهای سەرۆك مام جەلال بەردەوام بین و درێغی نەكەین لە خەباتی پەرلەمانی و دەستووری و سیاسی بۆ بەدیهێنانی ئاوات و ئامانجەكانی گەلەكەمان”.
هەر لەم یادەدا جەختدەكەینەوە، لەسەر نەهجی مام جەلال بەردەوامدەبین و هەر بەو دیدەوە خەباتدەكەین، پارێزگاری لە دەستكەوتە دەستوورییەكانی گەلی كوردستان و یەكڕیزی و تەبایی كوردستانی لە بەغداد و هاوسەنگی لە گوتار و كردار و پەیوەندییەكانمان.
