بەڕێوبەرایەتیی ئاسایشی ڕۆژئاوای سلێمانی ڕایگەیاندووە، سێ کەسیان بە تۆمەتی تەقەی هەڕەمەکی و دروستکردنی ترس و دڵەڕاوکێ لای هاوڵاتییان دەستگیركردووە.
لە ڕاگەیەندراوێكدا ئەمڕۆ شەممە 13ی ئازار، بەڕێوبەرایەتیی ئاسایشی ڕۆژئاوای سلێمانی ئاشكرایكردووە، “سەرلەبەیانی ئەمڕۆ لەسەر ڕێگای نێوان چەمچەماڵ تەکیەی کاکەمەند، سێ کەس بە ناوەکانی (ژ.ع.ع) و (ڕ.ب.ع) و (م.ت.ڕ) تەقەی هەڕەمەکییان كردووە، لەو كاتەدا هێزەکانمان دەگەنە سەریان و دەستگیریان دەکەن”.
ئەوەشی ئاشكراكردووە، “تۆمەتبارەکان یەکێکیان دانیشتووی پارێزگای کەرکوکە و یەکێکیشیان دانیشتووی ناحیەی پیرەمەگرونە و تۆمەتباری سێیەمیش دانیشتووی قەزای چەمچەماڵە”.
ئاسایشی ڕۆژئاوای سلێمانی ڕاشیگەیاندووە، “سەرجەمیان لەلایەن دادوەری دادگای لێکۆڵینەوەی چەمچەماڵەوە بە مادەی (٢١)ی چەک ڕاگیراون و چەک و ئۆتۆمبێلەکەیان دەستی بەسەردا گیراوە”.
ئاسایش ئەوەشی خستوەتەڕوو، “لەپێناو پاراستنی ئارامی و ئاسایشی هاوڵاتییان و نەهێشتنی حاڵەتەکانی تەقەکردندا هەوڵەکانمان بەردەوامن”.
