بافڵ جەلال تاڵەبانی لە میانەی پێشوازیکردنی لە بنەماڵەی موراد کانی کوردەیی رایگەیاند، هەر کەسێک لە پشت شەهیدکردنییەوە بێت رووبەڕووی دادگا دەکرێتەوە.
بافڵ جەلال تاڵەبانی سەرۆکی یەکێتیی نیشتمانیی کوردستان لە دەباشان پێشوازی لە خانەوادەی شەهید موراد کانی کوردەیی کرد و لە دیدارێکدا ستایشی رۆڵی بنەماڵەی شەهید موراد کانی کوردەیی کرد لە مێژووی خەباتی گەلەکەمان و بەخشینی چەندین شەهید لەپێناو خاکی کوردستان.
هەر لە دیدارەکەدا ئاماژەی بەوەکرد، “یەکێتی ماڵی هەمیشەیی ئێوەیە و پشتیوانتان دەبێت لە بەدیهێنانی دادپەروەری و سەروەریی یاسا، کەیسەکەی ئێوە مایەی نیگەرانی ئێمەشە و دڵنیابن هەر کەسێک لەپشت شەهیدکردنی موراد کانی کوردەییەوە بێت، رووبەڕووی دادگا دەکرێتەوە”.
هاوکات بنەماڵەی موراد کانی کوردەیی سوپاس و پێزانینی خۆیان گەیاندە سەرۆک بافڵ کە بەردەوام لەگەڵ بنەماڵەکەیاندا بووە، بەپەرۆشەوە مامەڵەی لەگەڵ کەیسەکە کردووە و پشتیوان بووە بۆ دۆزینەوەی ئەنجامدەرانی تاوانەکە.
وتیشیان، “یەکێتی حزبی ئێمەیە و لەمەودواش بە گڕوتینێکی زیاترەوە لە خزمەتکردن بەردەوام دەبن و لەسەر رێبازی پیرۆزی حزبی شەهیدان بەردەوام دەبین”.
