وتەبێژی بەرگری شارستانیی سلێمانی رایگەیاند، ئاگرەکەی نزیک فڕۆکەخانەی کشتوکاڵیی عەربەت کۆنتڕۆڵکراوە و زیانێکی ئەوتۆی نەبووە.
ئارام عەلی وتەبێژی بەرگری شارستانیی سلێمانی بە تۆڕی میدیایی ئێستای راگەیاند، “نیوەڕۆی ئەمڕۆ ئاگرێک لە نزیک فڕۆکەخانەی کشتوکاڵیی عەربەت کەوتەوە، ئەو شوێنەکەی ئاگرەکەی تێیدا کەوتەوە دەغڵودان و پووش و پاوەنی هاوڵاتییان بووە”.
ئاماژەی بەوەشکرد، “لەبەرئەوەی توانرا بە زووی ئاگرەکە کۆنتڕۆڵبکرێت زیانێکی ئەوتۆی بەدواوە نەبووە”.
لەماوەی 10 رۆژی رابردوودا ئەمە سێیەمین رووداوی ئاگرکەوتنەوەیە لە سنوورەکە روویدابێت و تا ئێستا هۆکارەکانیان ئاشکرا نەکراون.
