وەزیری تەندروستیی عێراق دڵنیایی دەداتە هاوڵاتییان سەبارەت بە تای خوێنبەربوون، دەڵێت، ئەوەی لە میدیا و تۆڕە کۆمەڵایەتییەکان سەبارەت بەو نەخۆشییە دەوترێت و بڵاودەکرێتەوە زیادەڕەویی تێدایە.
ساڵح حەسناوی وەزیری تەندروستیی عێراق لە کۆنگرەیەکی رۆژنامەوانیدا رایگەیاند، “هاوڵاتییان دڵنیادەکەمەوە کە ئەوەی لە میدیاکاندا دەنگۆی لەسەرە سەبارەت بە تای خوێنبەربوون جۆرێکە لە ترساندن و زیادەڕەویی تێدایە”.
باسی لەوەکرد، کە حاڵەتی تۆمارکراوی نەخۆشییەکە هەیە، بەڵام پرۆگرامی تایبەت لە نەخۆشخانەکان هەیە بۆ چارەسەرکردنی حاڵەتەکان.
جەختیکردەوە، “رێکارەکانی خۆپارێزی زۆر پێویستن، بەتایبەتی رێکارەکانی وەزارەتی کشتوکاڵ، بەخێوکەرانی ئاژەڵ و بەدواداچوون بۆ ئەو شوێنانەی کە ئاژەڵی تێدایە”.
وە وەزیری تەندروستی لە درێژەی قسەکانیدا وتی “پەیامێک بۆ هاوڵاتیان دەنێرم کە بابەتی تای خوێنبەربوون و بڵاوبوونەوە و مەترسییەکانی کەمترە لەوەی لە میدیاکان دەنگۆی لەسەرە”.
