وەزارەتی تەندروستیی عێراق دوایین ئاماری تووشبوون و گیانلەدەستدانی بە تای خوێنبەربوون بڵاوکردەوە، بەپێی ئامارەکە تا ئێستا 139 کەس تووشی نەخۆشییەکە بوون.
سەیف بەدر وتەبێژی وەزارەتی تەندروستیی عێراق ئامارەکەی بڵاوکردەوە و رایگەیاند، لە سەرەتای ساڵی 2023وە تا ئێستا ژمارەی تووشبووانی تای خوێنبەربوون گەیشتووەتە 139 کەس، ژمارەی گیانلەدەستدانیش بە نەخۆشییەکە بۆ 20 کەس زیادیکردووە.
بەپێی ئامارەکە تا ئێستا زۆرترین تووشبوون و مردن لە زیقار تۆمارکراوە و کەمترینیش لە هەولێر کە تەنها یەک کەس تووشی تای خوێنبەربوون بوو بەهۆیەوە گیانیلەدەستدا.
دوێنێ چوارشەممە وەزارەتی تەندروستیی هەرێمی کوردستانیش رایگەیاند، بڕی دوو ملیار و 771 ملیۆن دیناری بۆ دەستپێکردنی رێکارەکانی رووبەڕووبوونەوەی تای خوێنبەربوون تەرخانکرد.
