وەزارەتی کارەبای حکومەتی هەرێم ڕایگەیاند، دوای ئەوەی پێوەری زیرەک تۆمەتبارکرابوو، بە هۆکاری کەوتنەوەی ئاگرەکەی گەڕەکی نەورۆز لە هەولێر، لیژنەی لێکۆڵینەوە ئەوەی بۆ دەرکەوتووە، لەوشوێنانەدا پێوەرە زیرەکەکان هیچ کێشەیەکیان نەبووە و گڕیان نەگرتووە.
لە ڕوونکردنەوەکەی وەزارەتی کارەبادا هاتووە، “بە مەبەستی بەدواداچوون بۆ ئەو دووکانانەی سووتابوون، سەردانی شوێنەکەمان لە گەڕەكی نەورۆز کرد، بۆمان دەرکەوت کە پێوەرەکان نەسووتابوون و کار دەکەن”.
ئاماژەبەوەشکراوە، “هیچ شوێنەواری سووتان لەناو بۆردەکە دیار نییە و هەر چوار پێوەرەکە نەسووتاون و هەردوو سێرکێتەکان سەلامەتن و لە ئەنجامدا بۆمان دەرکەوت هۆکاری ئاگرکەوتنەوەکە پەیوەندی بە پێوەری زیرەکەوە نییە کە لە ستوون بەستراون و هۆکار لەناو دوکانەکانە”.
لە ڕوونکردنەوەکەی وەزارەتی کارەبادا ئەوەش ئاشکراکراوە، “لە کاتی سوتانی ئەو دووکانانە، دەنگۆی چەواشەکارانە سەبارەت بە هۆکاری ئاگرکەوتنەوەکە لە پەیجەکانی سۆشیاڵ میدیا بڵاوکرابووەوە و وەزارەتی کارەبا ڕێوشوێنی یاسایی بەرانبەر ئەو کەسانە دەگرێتە بەر کە هەواڵی چەواشەکارانە لە دژی خزمەتگوزارییەکانی بڵاودەکەوە”.
