قوباد تاڵەبانی جێگری سەرۆک وەزیرانی هەرێم پێشوازیکرد لە ماکیسم روبین کونسوڵی گشتی روسیا لە هەولێر و لە کۆبوونەوەیەکدا پەیوەندییەکانی نێوان هەولێر و بەغدا تاوتوێ کران.
ئەمڕۆ سێشەممە قوباد تاڵەبانی جێگری سەرۆک وەزیرانی هەرێم پێشوازیکرد لە ماکیسم روبین کونسوڵی گشتی رووسیا لە هەولێر لە گفتوگۆ لەبارەی بارودۆخی ناوخۆی کوردستان کرا و هەردوولا هاوڕابوون کە پێویستە لایەنە سیاسییەکان ناکۆکییەکانیان لەڕێگەی گفتوگۆوە چارەسەر بکەن و رێگە نەدەن ناکۆکییەکان کاریگەری لەسەر ژیان و گوزەرانی هاوڵاتییان دروست بکات.
لە بەشێکی دیکەی کۆبوونەوەکەدا پەیوەندییەکانی نێوان هەولێر و بەغدا تاوتوێ کران و قوباد تاڵەبانی ئاماژەی بەوەدا بەغدا قوڵایی ستراتیژی هەرێمی کوردستانە و هەموو هەوڵێکیان بۆ ئەوەیە ناکۆکییەکان بە شێوەیەکی ریشەیی و لە چوارچێوەی دەستوردا چارەسەر بکرێن بە جۆرێک لە بەرژەوەندی هەردوولادابێت.
هەر لە کۆبوونەوەکەدا قوباد تاڵەبانی ئاماژەی بەوەکرد، “دوای ساڵانێکی زۆر لە ناسەقامگیری و ناکۆکی، هاوڵاتییانی عێراق و هەرێمی کوردستان پێویستییان بە سەقامگیری زیاتر هەیە بۆ ئەوەی بتوانرێت دۆخی خزمەتگوزارییەکان باشتر بکرێت و پێکەوە کار بۆ گەشەپێدانی ئابوری بکەین”.
