“باڵۆن دۆر” لە یاریگای ئیتیحادە

بە ئەگەرێکی زۆرەوە کێبڕکێی نێوان ڤینیسیۆز جونیۆر و ئێرلینگ هالاند، براوەی خەڵاتی “باڵۆن دۆر” یەکلاییدەکاتەوە.

ئەمشەو چوارشەممە، لە یاریگای (ئیتیحاد) یانەکانی مانچستەر سیتی و ڕیاڵ مەدرید ڕووبەڕوودەبنەوە، یەکێک لەو دوو یانەیە بلیتی یاریی کۆتایی خولی یانە پاڵەوانەکانی ئەوروپا دەبڕێت.

لەو بارەیەوە ڕۆژنامەی مارکا نووسیویەتی، خەڵاتی تۆپی ئاڵتونی لە یاریگای ئیتیحادە، ئاست و داتاکانی ڤینیسیۆز و هالاند یەکلاکەرەوەن، براوەی نێوانیان بە ئەگەرێکی زۆرەوە خەڵاتەکە لە مێسی و مباپێ و یاریزانە گەورەکان دەڕفێنێت.

لە یاریی چووندا “ڤینی” گۆڵێکی تۆمارکرد و ئاستی ناوازە بوو، بەڵام هالاند بەهۆی وریایی هێڵی بەرگریی ڕیاڵ مەدریدەوە دەرنەکەوت، ڕۆژنامەی مارکا پێیوایە ئەوە وەک قەرزێک وایە و نەرویجییە زەبەلاحەکە ئەمشەو هەوڵی دانەوەی ئەو قەرزە دەدات.