نێیمار دا سیلڤا، ئەستێرەی بەڕازیلی یانەی پاریس سان جێرمان خۆی بە هۆکاری کێشەکانی پاریس نازانێت و ئامادەش نییە یانەکە بەجێبهێڵێت.
سەرچاوەیەکی نزیک لە نێیمار بە ئێزگەی “مۆنتی کارلۆ”ی فەرەنسی ڕاگەیاندووە، نێیمار ئارامە، پێیوایە هێرشی هاندەران و کۆبوونەوەیان لەبەردەم ماڵەکەیدا هەڵە بووە، چونکە خۆی بە بەشێک لە شکست و کێشەکانی پاریس سان جێرمان نازانێت.
سەرچاوەکە وتوویەتی، “هاوسەرەکەی نێیمار دووگیانە، بەم نزیکانە دێتە فەرەنسا و لەو وڵاتە دەژی، هیچ هۆکارێک نییە وا لە نێیمار بکات لە پاریس بڕوات، با بزانین هاوینی داهاتوو چی ڕوودەدات.”
هەروەها دەڵێت، “لە غیابی مێسی و مباپێ-دا نێیمار هەموو بەرپرسیارێتییەکی لەئەستۆ گرت و ئازاری زۆری چەشت، هیچ دادپەروەرییەکی تێدا نییە لەم کاتە هەستیارەدا هاندەران تۆمەتباری دەکەن.”
