وەزیری كار و كاروباری كۆمەڵایەتی ئاشكرایكرد، تەنها لە ئەمساڵدا زیاتر لە 600 هەزار خێزان مووچەی چاودێریی كۆمەڵایەتییان بۆ دابیندەكرێت.
ئەحمەد ئەسەدی وەزیری كار و كاروباری كۆمەڵایەتیی عێراق رایگەیاند، ئەنجومەنی وەزیران شەش راسپاردەی تایبەت بە وەزارەتەكەی پەسەندكردووە كە یەكێكیان هەمواركردنەوەی یاسای خانەنشینی و دەستەبەری كۆمەڵایەتییە.
وتیشی، “هەموو ئەم هەنگاوانە بۆ پشتیوانیكردنی كرێكارانی كەرتی تایبەتن و پێشبینی دەكەین لە رۆژانی داهاتوودا، هەمواركردنەوەی یاسای خانەنشینی و دەستەبەری كۆمەڵایەتیی كرێكاران پەسەندبكرێت”.
لەبارەی ئەو كەسانەی ناویان تۆماردەكرێت بۆ دەستەبەركردنی مووچەی چاودێریی كۆمەڵایەتی بۆیان، وەزیری كار ئاشكرایكرد، چاوەڕوانی پەسەندكردنی پڕۆژەیاسای بودجەن و ئەمساڵ زیاتر لە 600 هەزار خێزان مووچەی چاودێریی كۆمەڵایەتییان بۆ دابیندەكرێت.
