بەیانی ئەمڕۆ یەکێکی دیکە لە بریندارەکانی رووداوی تەقینەوەی تانکەرێک لە ناوچەی پیشەسازیی کەلار بە ناوی ئەحمەد عەلی لە نەخۆشخانە بەهۆی سەختی برینەکەیەوە گیانیلەدەستدا.
پەیامنێری تۆڕی میدیایی ئێستا گواستییەوە، “ئەحمەد عەلی، یەكێک لەو کەسانەی لە رووداوی تەقینەوەی تانکەرێکی سوتەمەنی لە چەند رۆژی رابردوودا لە ناوچەی پیشەسازیی کەلار برینداربووبوو، بەهۆی سەختی برینەکەیەوە گیانیلەدەستدا”.
رۆژی 24ی نیسان لە ناوچەی پیشەسازیی کەلار تانکییەکی گازی بارهەڵگرێک لە کاتی لەحیمکردنیدا، بەهۆی گەرمبوونییەوە تەقیەوە و بەهۆیەوە کەسێک گیانیلەدەستداوە و سێ کەسی دیکە برینداربوون، زیانی ماددییشی بە دەوروبەری رووداوەکە گەیاند.
هەر لە دوای رووداوەکە سەرجەم بریندارەکان بۆ چارەسەری پێویست رەوانەی سلێمانی کران.
