سەركردەیەكی چێوەی هەماهەنگی رایدەگەیەنێت، سێ پۆستی وەزاری یەكەم گۆڕانكاری لە حكومەتەكەی سودانی دەگرێتەوە.
توركی عەتبی، سەركردە لە چێوەی هەماهەنگی رایگەیاند، ئەنجامی هەڵسەنگاندن بۆ كابینەكەی محەمەد شیاع سودانی سەرۆك وەزیران تەواو بووە و لە بەردەم پێداچوونەوەی كۆتاییدایە.
وتیشی، “سودانی لە گۆڕانكاریی یەكەمیدا سێ پۆستی وەزاری ئەنجامدەدات، بەدوایدا گۆڕانكاریی دیكە دێت” ئاماژەی بەوەشكرد، “سودانی تێڕوانینێكی فراوان لەبارەی یەكەم گۆڕانكاریی وەزاری لە حكومەتەیدا لە كۆبوونەوەی داهاتووی چێوەی هەماهەنگی دەخاتەڕوو”.
تا ئەم ساتە هیچ هێزێكی سیاسی ناڕەزایی خۆی بۆ هەر گۆڕانكارییەكی پێشبینیكراو لە حكومەتدا نیشان نەداوە، چونكە لە بنەڕەتدا لەپێناو جێبەجێكردنی بەرنامەی حكومیی رێككەوتن لەسەركراوە، گۆڕانكارییەكەش بەپێی بنەمای روون و راشكاو لەڕێی هەڵسەنگاندنەوەیە، وەك ئەوەی عەتبی ئاماژەی پێدا.
لە 26ی نیسانی رابردوو سەرۆك وەزیرانی عێراق لە راگەیەندراوێكدا سووربوونی لەسەر گۆڕانكاریی وەزاری دووپاتكردەوە.
