سەرۆكی سەندیكای شۆفێران لە سلێمانی رایدەگەیەنێت، بۆ جیاكردنەوەی كاركردنی تاكسیی ناوشار و دەرەوەی شار ئامادەكاری بۆ لێدانی لۆگۆیەكی دیكە لە ئۆتۆمبێلی تاكسی دەكەن و دەشڵێت، “نووسراومان بۆ بەڕێوەبەرایەتیی گشتیی گواستنەوە و گەیاندن كردووە كە ئاراستەی وەزارەتی ناوخۆی بكات و چاوەڕوانی وەڵامی نووسراوەكە دەكەین”.
ئازاد ئەحمەد سەرۆكی سەندیكای شۆفێران لە سلێمانی لە لێدوانێكدا بە تۆڕی میدیایی ئێستای راگەیاند، “بەشێكی زۆری تاكسییەكانی كە خاوەنەكەی نیشتەجێی قەزا و ناحیەكانن لە سەنتەری شاری سلێمانی كاردەكەن و ئێمە ئامادەكاری دەكەین كە تاكسی ناوشار و دەرەوەی شار جیابكەینەوە بە جۆرێك كە تەنها لە شاری سلێمانیدا تاكسییەكانی ناوشار كاربكەن و تاكسیی قەزاو ناحییەكان بۆیان نەبێت لە شاردا كاربكەن و بە پێچەوانەشەوە”.
راشیگەیاند، “بەشێكی زۆری تاكسییەكانی دەرەوەی شار دۆسیەكانیان لە هاتوچۆیە و دەتوانرێت جیابكرێنەوە و ئێمە لۆگۆیەكیان بۆ دروستدەكەین كە بێبەرامبەر بدرێتە شۆفێرانی تاكسی بۆ ئەو مەبەستەش نووسراومان بۆ بەڕێوەبەرایەتیی گشتیی گواستنەوە و گەیاندن كردووە كە ئاراستەی وەزارەتی ناوخۆی بكات و چاوەڕوانی وەڵامی نووسراوەكە دەكەین”.
سەرۆكی سەندیكای شۆفێران باسی لەوەش كرد، ئەگەر وەزارەتی ناوخۆ وەڵامی نووسراوەكە بداتەوە و رەزامەندی بدات ئەوا دەبێت سەرجەم تاكسییەكانی ناوشار و دەرەوەی شار ئەو لۆگۆیە وەربگرن كە ئەوەش لە بەرژەوەندیی خۆیانە”.
