وەزارەتی ئەوقافی هەرێم لەسەر هێرشكردنە سەر مزگەوتێك لە شەنگال راگەیەندراوێكی بڵاوكردەوە و دەڵێت، “هێرشی سەر مزگەوتەكەی شەنگال كەسییەوە و پەیوەندیی بە هیچ ئایینێكەوە نییە داوا لە لایەنی پەیوەندیداری حكومەتی عێراق دەكەین بەرپرسانە مامەڵە لەگەڵ ئەو دۆخە بكات.
بەپێی راگەیەندراوێكی وەزارەتی ئەوقاف و كاروباری ئایینیی هەرێم كە وێنەیەكی دەست تۆڕی میدیایی ئێستا كەوتووە و تێیدا هاتووە، دوێنێ پێنجشەممە لە ئەنجامی گرژی و ئاڵۆزی دەڤەری شەنگال دژی گەڕانەوەی ژمارەیەك خێزانی عەرەب بۆ ناوچەكە ئاڵۆزی دروستبووە و بەهۆیەوە ژمارەیەك كەس هێرشیانكردووەتە سەرحەرەمی مزگەوتی شارەكە.
لە راگەیەندراوەكەدا هاتووە، ئێمە لەوەزارەتی ئەوقاف و كاروباری ئایینی بە توندی ئیدانەی بێڕێزی و دەستدرێژی كردنەوە سەرمزگەوت و هەرناوەندێكی تری ئایینی دەكەین، پێشمانوایە ئەم كارە ناڕەوایە دوورە لە ئاداب و نەریتی خۆڕەوشتی ڕەسەنی ئایینی و كوردەواری و هەوڵێكی پلان دارێژراوە بۆ تێكدانی ئاشتی كۆمەڵایەتی و ئایینی لە ناوچەكەدا، بۆیە ھەموو ئەو لایەنانەی لێناگەڕێن دۆخی شەنگال ئاساییبكرێتەوە.
وەزارەتی ئەوقاف و كاروباری ئاینیی هەرێم جەختیشدەكاتەوە، ئەم جۆرە كردەوانە پلانی كەسین پەیوەندی بە هیچ ئایینێكەوە نییە، بۆیە داوا لە لایەنی پەیوەندیداری حكومەتی عێراقی فیدراڵ دەكەین، بەرپرسانە مامەڵە لەگەڵ دۆخی شەنگالدا بكەن و بكەرانی رووداوەكە دەستنیشان بكەن و رووبەڕووی سزای یاسایی خۆیان بكەنەوە.
