لەدوای هەڵکوتانە سەر ماڵەکەی و رفاندنی بەرەو شوێنێکی نادیار هەڵمەتێکی ناڕەزایەتی لەلایەن چالاکوانان و رۆژنامەنووسان دەستیپێکرد.
بەرەبەیانی ئەمڕۆ عەلی مەحمود ناسراو بە عەلی سیاسی لە ماڵەکەی خۆیدا لە شاری هەولێر لەلایەن هێزێکی چەکدارەوە رفێندرا و لەو بارەیەشەوە هێمن عەبدوڵا نووسەر لە شاری هەولێرەوە نووسیویەتی، “جگە لە خەمخۆری گشتی، نیشتمانپەروەری، راستگۆیی چیتر لە چالاکوان(عەلی سیاسی) بەدیناکەم، رەخنەکانی تەنزەکانی ئەم چوارچێوەیە تێناپەڕێنێت، ئەو نە شەیدای پلە و پۆستە نە شەیدای پارە و سامانە، ئازادی بۆ چالاکوان عەلی سیاسی”.
لەلایەکی دیکەشەوە زانا حەسەن رۆژنامەنووس نووسیوویەتی، “رفاندن و دەستگیركردنی عەلی سیاسی كارێكی ترسنۆكانەیە ئەو بەئاشكرا قسەی كردووە وقەڵەمی بەدەستەوەیە نەوەك فیشەك و تەعزیب بەهیواین بەزوویی چارەنوسی دیاریبكرێت”.
هاوکات محەمەد کیانی ئەندامی پێشووی ئەنجومەنی نوێنەرانی عێراق نووسیوویەتی، ” پێشمەرگە و چالاكوانی مافی مرۆڤ و دژی جینۆسایدی گەلی كورد وچەكی كیمیاوی و جاشە ئەنفالچیەكان و داواكاری دادگاییكردنیان بە باوكی قایمقانی هەولێرەوە. پارتی بەرپرسە لە ژیان و سەلامەتی تێكۆشەر و جوامێرد و یەكسانخوازی و خەمخۆر و خۆشەویستی سەجەم كوردستان عەلی سیاسی، دەبێت بەزووترین كات ئازادی بكات و قەرەبووی بكاتەوە و داوای لێبوردنی لێ بكەن”.
