سەرۆكی یەكێتی رایدەگەیەنێت، قەڵادزێ و خەڵکەکەی سیمبوولی تێکۆشان و بەگژداچوونەوەی زوڵم و ستەم بوون و دەشڵێت، ئەرکی حکومەتە خزمەتەکانی بۆ ئەو شارە، بارتەقای رەنج و قوربانیدانەکانیان بێت.
بافڵ جەلال تاڵەبانی، سەرۆكی یەكێتیی نیشتمانیی كوردستان لە یادی 49 ساڵەی بۆردومانەکەی قەڵادزێ و زانکۆی سلێمانی، پەیامێکی بڵاوکردەوە و رایگەیاند، قەڵادزێ و خەڵکە قارەمانەکەی لە مێژووی خەباتی گەلی کورددا، سیمبوولی تێکۆشان و بەگژداچوونەوەی زوڵم و ستەم بوون و بە خوێنی خۆیان کوردستانیان پاراستووە.
دەشڵێت، “بۆیە ئەرکی حکومەتە خزمەتەکانی بۆ ئەو شارە خۆشەویستە، بارتەقای رەنج و قوربانیدانەکانیان بێت”.
دەقی پەیامەکە:
بە شکۆوە یادی ٤٩ ساڵەی شەهیدانی بۆردومانەکەی قەڵادزێ و زانکۆی سلێمانی دەکەینەوە و سەری رێزمان بۆ قەڵادزێییە تێکۆشەرەکان دادەنەوێنین کە نموونەی خەبات و قوربانیدانن لەپێناو سەربەرزیی کوردستان.
قەڵادزێ و خەڵکە قارەمانەکەی لە مێژووی خەباتی گەلی کورددا، سیمبوولی تێکۆشان و بەگژداچوونەوەی زوڵم و ستەم بوون و بە خوێنی خۆیان کوردستانیان پاراستووە. بۆیە ئەرکی حکومەتە خزمەتەکانی بۆ ئەو شارە خۆشەویستە، بارتەقای رەنج و قوربانیدانەکانیان بێت.
دروود بۆ رۆحی شەهیدانی ئەو کارەساتە لەبیرنەکراوە و سڵاوی خۆڕاگری بۆ کەسوکارە سەربەرزەکەیان دەنێرین. یەکێتیی نیشتمانیی کوردستان رەنج و تێکۆشانی ئێوە لە یاد ناکات و بەرامبەر دڵسۆزیتان وەفادار دەبێت.
نەمری بۆ شەهیدان و سەربەرزی بۆ کورد و کوردستان
بافڵ جەلال تاڵەبانی
سەرۆکی یەکێتیی نیشتمانیی کوردستان
