وەزیری دادی حکومەتی هەرێم ڕایدەگەیەنێت، هەرچەندە ڕێز لە دادگا و بڕیارەکانی دەگرن، بەڵام بڕیاری دادگای فیدڕاڵی تایبەت بە نەوت و گازی هەرێم لەڕووی زمانەوانی و شکڵییەوە بەلای ئەوانەوە پەسەند نین.
فەرسەت ئەحمەد، وەزیری دادی حکومەتی هەرێمی کوردستان لە بارەی بڕیارەکەی دادگای فیدراڵیی عێراق تایبەت بە نەوت و غاز لە هەرێمی کوردستان لە ڕاگەیەندراوێكدا ئاماژەی بەوەكردووە، “هەرچەندە ڕێزمان بۆ ئەو دادگایە و بڕیارەکانی هەیە، بەڵام پێمانوایە بە دەرکردنی ئەو بڕیارە وەکو ئەوە وایە سەرلەنوێ دووبارە جارێکی تر دەستوور نووسرابێتەوە”.
وەزیری داد پێشیوایە، “ماددە دەستوورییەکان و ئەحکامەکانیان لە ناوەڕۆکەکانیان دەرهێنراون، بەوەش زیانێکی زۆر بەر هەرێمی کوردستان دەکەوێت”.
ڕوونیشیكردووەتەوە، “ئەگەر بێت و ماددەکان لە ڕێگەی تەفسیرکردنیانەوە بێنەگۆڕین، ئەو تەفسیراتەی کە دادگای فیدراڵی پشتی پێ بەستووە، لە ڕووی زمانەوانی و شکڵیشەوە، بەلای ئێمەوە لە هەرێمی کوردستان، پەسەندنین”.
